ཕྱི་ལོ་༢༠༢༡ ལོའི་ཟླ་༨ པའི་ཚེས་ ༨ ཉིན་སུད་སི་དང་ལིག་ཏེན་སིཊཡན་བོད་རིགས་མི་མང་ནས་ཐུགས་རྗེ་ཆེ་ཞེས་པའི་སྲིད་སྐྱོང་ཟུར་པ་མཁས་དབང་བློ་བཟང་སེང་གེ་མཆོག་ལ་མཛད་སྒོ་ཟབ་རྒྱས་ཞིག་གོ་སྒྲིག་གནང་དོན་ལྟར། འདི་གར་ཡུ་རོབ་སུད་སི་ས་གནས་མདོ་ཁམས་ཆུ་བཞི་སྒང་དྲུག་ནས་གོ་སྐབས་དམ་འཛིན་གྱིས་སྲིད་སྐྱོང་ཟུར་པ་མཁས་དབང་བློ་བཟང་སེངྒེ་མཆོག་ལ་ཤེལ་གྱི་གཟེངས་རྟགས་ཤིག་དང་སུད་སྒོར་༡༠༠༠་ ཐམ་པ་བཀའ་དྲིན་རྗེས་དྲན་གྱི་ཚུལ་དུ་ཕུལ་དེ་ བཞིན་རྫ་ཆུ་ཁ་པ། ལི་ཐང་དང་བྲག་གཡབ་སྐྱིད་སྡུག་ནས་གཟེངས་རྟགས་ཕུལ་ཡོད་པ་རེད།
ཡུ་རོབ་སུད་སི་ས་གནས་མདོ་ཁམས་ཆུ་བཞི་སྒང་དྲུག་གི་གཟེངས་རྟགས་ནང་དོན།
༼ མི་མང་གིས་ཐད་ཀར་འོས་འདེམས་བྱས་པའི་བོད་ཀྱི་སྲིད་སྐྱོང་ཐོག་མ་འབུམ་རམས་པ་མཁས་དབང་བློ་བཟང་སེངྒེ་མཆོག་གིས་འདས་པའི་ལོ་ངོ་བཅུའི་རིང་བོད་བསྟན་སྲིད་མི་རིགས་ཀྱི་དོན་དུ་ལྷག་བསམ་ཟོལ་མེད་ཀྱི་ཆབ་དཔལ་རིག་གསུམ་ལ་འབུར་དུ་ཐོན་པའི་ཕྱག་ལས་གནང་པ་དང༌། ལྷག་དོན་ཆོལ་གསུམ་གོང་བུ་གཅིག་གྱུར་གྱི་ལམ་ནས་གཞིས་བྱེས་བོད་མི་མཉམ་ཁྲིད་ཀྱི་ནུས་པ་སྔར་ལྷག་སྟོན་པ་སོགས་༧གོང་ས་མཆོག་གི་དགོངས་བཞེད་དང་རྒྱ་ཆེའི་མི་མང་གི་མངོན་འདོད་ལྟར་རླབས་ཆེན་གྱི་ཕྱག་ལས་གནང་བར་བཀའ་དྲིན་རྗེས་དྲན་དང་ཐུགས་རྗེ་ལེགས་གསོལ་དུ། ༽
སྲིད་སྐྱོང་ཟུར་པ་མཁས་དབང་བློ་བཟང་སེང་གེ་མཆོག་ལ་ཚོགས་སྐྱིད་ཁག་གིས་མི་མང་གི་ཚབ་ཞུས་ཏེ་བཀའ་དྲིན་ཆེ་ཞུའི་གཟེངས་རྟགས་ཕོན་ཆེན་ཕུལ་པ་རེད། དཔེར་ན། ཕྱི་ལོ་ ༢༠༢༡ ཟླ་ ༤ ཚེས་ ༢༧ ཉིན་ཉི་ཧོང་རྒྱལ་ཡོངས་གྲོས་ཚོགས་བོད་དོན་རྒྱབ་སྐྱོར་ཚོགས་པས་དྲ་རྒྱ་བརྒྱུད། ཉི་ཧོང་རྒྱལ་ཡོངས་གྲོས་ཚོགས་བོད་དོན་རྒྱབ་སྐྱོར་ཚོགས་པའི་ཚོགས་མི་རྣམ་པ་དང་ཉི་ཧོང་གི་གྲོས་ཚོགས་འཐུས་མི་ཁག་གཅིག ཉི་ཧོང་གི་སྲིད་བློན་ཟུར་པ་སྐུ་ཞབས་ཤིན་ཛོ་ཨ་བྷེ་ (Shinzo Abe) མཆོག་དང་བདེ་སྲུང་བློན་ཆེན་གཞོན་པ་ན་ཀ་ཡ་མ་ (Yasuhide Nakayama) མཆོག་བཅས་ཉི་ཧོང་གི་གྲོས་ཚོགས་
ཀྱི་རྒྱལ་སྤྱིའི་ཚོགས་ཁང་ཆེན་མོའི་ནང་དུ་ལྷན་འཛོམས་ཀྱིས།སྐབས་དེར་འཕོས་ལ་ཉེ་བའི་དཔལ་ལྡན་སྲིད་སྐྱོང་མཆོག་ལ། ལོ་བཅུའི་ལས་དོན་ཧ་ཅང་ལེགས་པོར་གནང་བར་དགའ་བསུའི་འཚམས་འདྲི་གནང་ཡོད། དེ་ཡང་རྒྱ་ནག་གཞུང་གི་གནོན་ཤུགས་ཡོད་མེད་ལ་མ་ལྟོས་པར་སྲིད་བློན་ཟུར་པ་མཆོག་གིས་བཀའ་སློབ་གནང་པ་དེ་ནི། བོད་དོན་སྤྱི་དང་མཁས་དབང་བློ་བཟང་སེང་གེ་མཆོག་ལ་ཧ་ཅང་གིས་མཐོང་ཆེན་གནང་བ་ཞིག་ཆགས་ཡོད།
ཟླ་ ༤ ཚེས་ ༢༤ ཉིན་བྱང་ཨ་རི་ནིའུ་ཡོག་དང་ནིའུ་འཇར་སི་བོད་རིགས་སྤྱི་མཐུན་ཚོགས་པ་དང་། དེའི་སྔོན་དུ་ཝ་ཤིན་ཊོན་དུ་གནས་སྡོད་བོད་རིགས་སྤྱི་མཐུན་ཚོགས་པ། ད་དུང་རྒྱལ་སྤྱིའི་ཏྲེ་ཧོར་དང་སྦྲག་སོག་འབྲི་གསུམ་གྱི་སྐྱིད་སྡུག་ཁག་གིས་གཟེངས་རྟགས་ཕུལ་པ་དང་། ཟླ་ ༥ ཚེས་ ༢༡ ཉིན་བཙན་བྱོལ་ནང་དུ་བོད་དོན་འཐབ་རྩོད་ཐད་ལས་འགུལ་སྤེལ་མཁན་གཞུང་འབྲེལ་མིན་པའི་ཚོགས་ཆེ་ཁག་བཞི་སྟེ། བོད་ཀྱི་གཞོན་ནུ ལྷན་ཚོགས་དང་། བོད་ཀྱི་བུད་མེད་ལྷན་ཚོགས། བོད་རྒྱལ་ཡོངས་མང་གཙོ་ཚོགས་པ། བོད་རང་བཙན་སློབ་ཕྲུག་ཚོགས་པ་བཅས་ཀྱིས། བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེང་གེ་མཆོག་དབུས་པའི་བཀའ་ཤག་སྐབས་༡༥ པའི་བཀའ་བློན་རྣམས་ལ་ཆེ་བསྟོད་ཀྱི་གཟེངས་རྟགས་ཕུལ་ཡོད། དེ་ཡང་ཁོང་རྣམས་ཀྱིས་སྲིད་སྐྱོང་འབུམ་རམས་པ་བློ་བཟང་སེངྒེ་མཆོག་གིས། ཕྱི་ལོ་༢༠༡༡ ནས་༢༠༢༡ བར་བོད་ཀྱི་སྲིད་སྐྱོང་གིས་འགན་འཁུར་བཞེས་པའི་ལས་ཡུན་རིང་། ༧གོང་ས་མཆོག་གི་བཀའ་དགོངས་བཞིན་བོད་བསྟན་སྲིད་མི་རིགས་ཀྱི་དོན་དུ་སྐུ་ངལ་འཛེམས་མེད་ཀྱིས་རླབས་ཆེའི་མཛད་དོན་མཐའ་དག་ལ་འབད་བརྩོན་ལྷོད་མེད་གནང་བར་ཡི་རང་བསྔགས་བརྗོད་ཡོད་ཅེས་སོགས་ཞུས་ཡོད།
ཟླ་ ༦ ཚེས་ ༢༠ ཉིན་ཨ་རིའི་བྷོ་སི་ཊོན་བོད་རིགས་སྤྱི་མཐུན་ཚོགས་པ་དང་།ཟླ་༧ ཚེས་ ༦ ཉིན་སྐུའི་འཁྲུངས་ལྷ་དབྱར་གསོལ་དང་ཨ་རི་ཀེ་ན་ཀྲི་ཀ་ཀྲིའི་བོད་རིགས་སྤྱི་མཐུན་ཚོགས་པ་སོགས། བྱང་ཨ་རིའི་ས་ཁུལ་འདྲ་མིན་ནང་བོད་རིགས་སྤྱི་མཐུན་ཚོགས་པ་དང་ཚོགས་སྐྱིད་ཁག་གིས་གཟེངས་རྟགས་འབུལ་ཡོད་པ་ཟླ་༨ ཚེས་ ༩ ཉིན་སྦེལ་ལྗམ་བོད་རིགས་ཚོགས་པས་གདན་ཞུ་ཐོག་གསེར་གྱི་གཟེངས་རྟགས་ཕུལ་འདུག། དེ་བཞིན་ས་གནས་གཞོན་ནུ་དང་ཆུ་བཞི་སྒང་དྲུག། ཏྲེ་ཧོར་སྐྱིད་སྡུག་ལི་ཐང་སྐྱིད་སྡུག་བཅས་ཀྱིས་དངུལ་གྱི་གཟེངས་རྟགས་ཕུལ་འདུག། བོད་ནས་ཐུགས་རྗེ་ཆེ་དང་བཀའ་དྲིན་ཆེ་ཞུ་ཆེད་དབྱར་རྩ་དགུན་འབུ་ཡང་བསྐུར་ཡོད་ཀྱི་འདུག།
དེ་དག་གི་དགོས་དོན་གཙོ་བོ་ནི། སྲིད་སྐྱོང་ཟུར་པ་མཁས་དབང་བློ་བཟང་སེང་གེ་མཆོག་གིས་ཆབ་སྲིད་ཀྱི་འགན་དབང་ཞུས་ནས། མི་ལོ་བཅུའི་རིང་༧གོང་ས་མཆོག་གི་དགོངས་གཞི་ལྟར། རྒྱལ་སྤྱི་དང་བོད་ཕྱི་ནང་གི་གནས་བབ། བོད་མིའི་སྒྲིག་འཛུགས་ཀྱི་ཆབ་དཔལ་རིག་གསུམ་ཡར་རྒྱས་ཕུན་སུམ་ཚོགས་པར་བཏང་བར་བཀའ་དྲིན་ཆེ་ཞུའི་གཟེངས་རྟགས་ཡིན་ཞེས་བརྗོད་བཞིན་ཡོད།